Sai ema diak nafatin iha hanoin, hahalok no intensaun.

 Ohin loron tempu ida nebe kmanek tebes, anin nebe fo nia malirin no manufuik mai ho nia lian murak no barulho seluk nebe natureza oferese.

Hanesan bain-bain kamnek maromak nian nunka falta nia furak husi esperensia ba sira nebe observa nia prejensa.

Ohin loron hau atu ba vijita hau avo, maibe antes ba iha neba hau ba hau nia kolega nia uma no haris iha nia fatin tan bee mos nee distante tebes husi hau uma, maibe hau nia kolega nia iha bee mos nebe wain. Iha momentu hau haris hela hau rona lian barulhu iha liur. Hau rona barulhu ne'e hanesan ema mak lao, halo hau kurioju no husu ba hau an se los mak mai iha nee? tamba hau hatene hela katak hau mesak mak iha nee, kolega ho nia familia sira sai hela. Nune'e, hau haris lalais no ba liur hodi hare no deskobre katak katak ema sira ne'e seguransa iha kolega nia fatin. adepois hau komprimenta no deside hodi kontinua hau nia planu hodi ba iha hau nia avo nia fatin.

Bainhira,iha dalan atu ba besik hau nia avo nia fatin, husi do'ok hau hetan hau nia tiu tu'ur hela kolia ho hau nia avo, hau kurioju tebes ba saida mak sira kolia maske hau lahatene maibe hau sente saida mak sira kolia ne'e interesante tebes. Ho hanoin ida ne'e, hau lao ba besik sira maibe seidauk to'o iha neba hau hare hau nia avo husik ona hau nia tiu ne'e no lao dadun. Wainhira hau to'o iha nebe hau nia avo la iha nebe ona. Hau komprimenta hau nia tiu no nia la hein hau tu'ur lai no kontinua nia mahusuk ne'e mai hau. "Valdo" hau nia tiu bolu, hodi dehan "Saida mak o sei halo ba sira nebe husik o no la konsidera o hanesan familia iha tempu o nia moris kiak rabat rai no agora sira mai besik o tamba o moris diak ona?".

Hau komesa hatan "Ba iha situasaun hanesan ne'e ita tenke sai exemplu ba sira hodi kultiva ba iha ita nia fuan katak sira nunka iha hanoin nebe haterus ita iha tempu uluk no agora. Karik, ita konsidera sira nafatin hanesan neba ita la iha buat seluk mak ita tauk hodi lakon. Sira bele mai besik ita hodi uza ita maibe ita tenke iha hanoin nebe forte no pojitivu katak sira la iha intensaun hanesan neba, maibe,sei karik iha loron ikus mak sira husik fali ita, tamba, sira hetan ona saida mak sira hakarak ka la iha buat ida mak sira hetan iha ita mak bele banefita sira. Saida mak ita bele halo mak ita nia parte deit hodi deside la halo diferensia ka indentifika ema nia posibilidade no imposibilidade, na realidade ita laos Maromak no ita labele hatene no koontrola ema ida nia hanoin ka nia desizaun. Maibe ita bele deside ba ita nia an hodi hanoin no halo diak nafatin maske situasaun ka kondisaun la autoriza. Importante mak ita deside sai ema nebe diak iha hanoin no intensaun."

Ho resposrta ida ne'e hau nia tiu komesa komprende ho nia gestura doko ulun tun sae, no la kleur hau nia tia lori kafe mai hodi ami hemu no hamnsa hamutuk.

Hakarak hateten deit, istoria ida ne'e laos realidade maibe mehi nebe hau hetan ohin dader loron 12/08/2021 no ema nebe hau hetan hanesan hau nia avo nia mate ona tinan kotuk nia ema matenek ida ba hau nia tiu fali nia sei moris hela. Hau fahe ida nee tamba hau sente ita hotu presiza ema atu konfirma, "Saida los mak ita halo diak no saida los mak ita halo sala?".

Importante liu mak deside hodi sai ema diak nafatin iha hanoin, hahalok no intensaun. Mai ita hotu halo ita nia parte no husik ema seluk halo sira nia parte. Atu taka hau nia hakerek ne'e hau hakarak hato'o katak Maromak hadomi ita hotu, dame no paz sai ita nia moris rohanlaek.